مع د. هديل جهاد، طبيبة الأمراض الجلدية والتجميل..
هنعرف النهارده كل حاجة عن الميزوثيرابي، واستخداماته للبشرة والشعر، وكمان لعلاج السيلوليت اللي معظم البنات بتشتكي منه، تابعونا..
يعني إيه ميزوثيرابي؟!
الميزوثيرابي؛ معناه العلاج عن طريق حقن الجلد مباشرة بطرق معينة في المنطقة اللي عايزين نعالجها، وده طبعا باختلاف المادة اللي بتستخدم للحقن؛ سواء حقن للشعر، أو حقن لإذابة الدهون، أو للنضارة؛ يعني الطريقة واحدة وهي حقن الجلد، ولكن باختلاف المواد المستخدمة في الحقن.
فوايد الميزوثيرابي
الميزة في الميزوثيرابي إنه بيعالج المشكلة اللي عندنا بشكل فعّال وقوي جدا وسريع، وده بعكس العلاجات العادية القديمة، اللي بيكون تأثيرها بطيء وضعيف جدا، بالإضافة إلى الأعراض الجانبية اللي ممكن تكون مصاحبة له؛ يعني لو عايزين نعالج الشعر كان بيبقى عن طريق تناول الفيتامينات أو دهن لوسيون على الشعر، والفيتامينات دي ممكن يكون مفعولها بطيء، أو إن نسبة بسيطة جدا منها هي اللي بتوصل للجسم، والباقي بيتكسّر أو بيخرج مع إفرازات الجسم، وبالتالي تأثيرها بيكون مش قوي، بالإضافة إنها كانت بتسبّب أعراض جانبية في الجسم؛ زي مثلا نمو باقي شعر الجسم مش شعر الرأس فقط، أو ظهور الشعر في مناطق جديدة وغريبة.
ودلوقتي تعالوا نتعرّف على بعض فوائد الميزوثيرابي...
علاج فعّال لتساقط الشعر
علاج الشعر بالميزوثيرابي بيستهدف شعر الرأس فقط، وده عن طريق حقن فروة الرأس بالمواد الطبيعية والفيتامينات اللي عايزينها توصل لبصيلة الشعر وبيكون الشعر محتاجها فعلا، وبكده نكون ضمنا إن العلاج وصل للمكان المطلوب وبالكمية اللي إحنا عايزينها، وبتبقى النتيجة فعّالة أوي وهايلة؛ علشان كده الميزوثيرابي بقى بيستخدم بكثرة حاليا لعلاج مشكلات الشعر؛ سواء التساقط أو ضعف الشعر.
تجنّب مشكلة الصلع
الميزوثيرابي بيعالج مشكلة الصلع عند الرجال، وبيساعد على تأخير ظهوره أو ظهوره بنسبة بسيطة، بس أهم حاجة إن العلاج يبدأ في وقت مبكر؛ يعني تكون بصيلات الرأس لسه موجودة وماتكونش ماتت ومافيش حاجة تحييها.
العلاج بالنسبة للشباب بياخد فترة أطول عن البنات، بس أهم حاجة إنها ماتكونش مشكلة مَرضية أو وراثية، أو مشكلة في الهرمونات، وطبعا بيتم عمل تحاليل وفحوصات قبل ما نبدأ العلاج.
نحت الجسم والتخلص من السمنة الموضعية
السمنة الموضعية هي مشكلة بتؤرق الولاد والبنات؛ لأنها بتخلّي شكل الجسم مش متناسق، والمشكلة دي حلّها هو تفتيت الدهون (Lipolysis)؛ بمعنى إننا بنحقن تحت الجلد في المناطق اللي فيها دهون بمواد تفتّت الدهون، وتوصّلها للجهاز الليمفاوي المسئول عن توصيل الدهون الزيادة للكبد، واللي بدوره بيكسر الدهون ويقدر الجسم يتخلص منها.
بس لازم ناخد بالنا إن الميزوثيرابي مش بيحل مشكلات السمنة الزائدة عن الحد؛ بمعنى إن لو بنت وزنها أكتر من الطبيعي بـ20 أو 30 كيلو ما ينفعش إنها تلجأ للميزوثيرابي لإنقاص الوزن، ولكن هو علاج موضعي للأعراض الموضعية.
يعني لو الجسم مظبوط وفيه منطقة معينة فيها دهون زيادة وشكلها مش متناسق مع باقي الجسم، في الحالة دي بنستخدم الميزوثيرابي؛ لأنه بيعتبر نحت للجسم مش تخسيس، بمعنى إن الجسم بيقل في المقاس، ولكن مش على الميزان.
التخلّص من السيلوليت
السيلوليت هو التعريج اللي بيكون في الجسم، وبيكون شكله عامل زي حبيبات شبه شكل قشر البرتقال، وده سببه إن توزيع الدهون تحت الجلد بيكون مش منتظم، أو فيه تجمعات دهنية تحت الجلد بتعمل شكل بروز وتعريج في الجسم.
ودي بيكون علاجها عن طريق الميزوثيرابي، بمادة معينة بتتحقن في المناطق دي وبتفتت الدهون اللي تحت الجلد وبتساويه، بالإضافة إنه بيكون فيه مادة لشد الجلد وتزويده بالكولاجين؛ بحيث إن الجلد يبقى مستوي وأملس.
الثلاثاء نوفمبر 08, 2011 10:53 pm